काठमाडौं, असार १५ । राष्ट्रिय धान दिवस तथा दही–चिउरा खाने दिनको अवसरमा नेपाली कांग्रेसका सभापति गगन थापा ले शुभकामना व्यक्त गर्दै किसानको सम्मान, कृषि आधुनिकीकरण र खाद्य आत्मनिर्भरतामा विशेष जोड दिएका छन्।
शुभकामना सन्देशमा उनले नेपाल कृषि प्रधान देश भएकाले कृषि राष्ट्रको सभ्यता, संस्कृति र अर्थतन्त्रको प्रमुख आधार रहेको उल्लेख गरेका छन्। खेतमा पसिना बगाएर देशको खाद्य सुरक्षा सुनिश्चित गर्ने किसानप्रति सम्मान व्यक्त गर्दै उनले असार १५ किसानको श्रम, सङ्घर्ष, आशा र आत्मनिर्भरताको उत्सव भएको बताएका छन्।
थापाले नेपालको संविधानले प्रत्येक नागरिकको खाद्यसम्बन्धी हकलाई मौलिक अधिकारका रूपमा सुनिश्चित गरेको उल्लेख गर्दै धान उत्पादन वृद्धि गर्नु केवल कृषि कर्म मात्र नभई संविधानको मर्म कार्यान्वयनसँग पनि जोडिएको विषय भएको बताएका छन्।
यद्यपि, किसानहरूले हरेक वर्ष बीउ, मल, सिँचाइ र उत्पादनको उचित मूल्यको अभाव झेल्नुपरेको तथा धान खेती अझै पनि वर्षामा निर्भर रहनुपर्ने अवस्थाप्रति उनले सरकारको ध्यानाकर्षण गराएका छन्। जलवायु परिवर्तनका कारण कृषि क्षेत्रमा थप चुनौती सिर्जना भएको उनको भनाइ छ।
यस वर्षको राष्ट्रिय धान दिवसको नारा ‘जलवायुमैत्री प्रविधि, धानमा आत्मनिर्भरता र समृद्धि’ स्मरण गर्दै थापाले मौसमअनुकूल तथा वातावरणमैत्री कृषि प्रविधिको विस्तार गर्नुपर्ने आवश्यकता औँल्याएका छन्। आधुनिक प्रविधिको प्रयोगबाट उत्पादन वृद्धि गर्दै चामल आयातमा निर्भरता घटाउन सकिने उनको विश्वास छ।
उनले सिँचाइ विस्तार, आधुनिक कृषि प्रविधिको प्रयोग, उन्नत बीउ, गुणस्तरीय मल, भण्डारणको व्यवस्था तथा किसानले उत्पादनको उचित मूल्य पाउने सुनिश्चितता गर्नुपर्नेमा जोड दिएका छन्। साथै, कृषिलाई सम्मानित, मर्यादित र आकर्षक पेशाका रूपमा विकास गर्न सबै पक्ष एकजुट हुनुपर्ने आवश्यकता पनि औँल्याएका छन्।
सन्देशको अन्त्यमा थापाले राष्ट्रिय धान दिवस तथा असार १५ ले अन्नदाता किसानप्रतिको सम्मान अझ सुदृढ बनाउँदै खाद्य सुरक्षा र कृषि समृद्धिको दिशामा सबैलाई प्रेरणा प्रदान गरोस् भन्ने शुभकामना व्यक्त गरेका छन्।
प्रतिक्रिया