मध्यपूर्वमा तनावसँगै कच्चा तेलको मूल्यमा ठूलो वृद्धि

काठमाडौं । मध्यपूर्वमा बढ्दो तनावका कारण विश्वव्यापी तेल आपूर्तिमा अवरोध आउन सक्ने चिन्ताबीच अन्तर्राष्ट्रिय बजारमा कच्चा तेलको मूल्य उल्लेखनीय रूपमा बढेको छ। बुधबार ब्रेन्ट क्रुडको मूल्य कारोबारका क्रममा प्रतिब्यारेल ९५ अमेरिकी डलरभन्दा माथि पुगेको हो, जुन करिब छ सातापछि पहिलोपटक यो स्तरमा पुगेको हो।

अन्तर्राष्ट्रिय बेन्चमार्क मानिने ब्रेन्ट क्रुडको मूल्य केही समय ९५ डलरभन्दा माथि पुगेपछि सामान्य रूपमा घटे पनि उच्च स्तरमै कायम रहेको छ। यस्तै, अमेरिकी ‘वेस्ट टेक्सास इन्टरमिडियट’ (डब्लुटीआई) क्रुडको मूल्यमा पनि वृद्धि देखिएको छ।

विश्लेषकहरूका अनुसार अमेरिका–इरानबीच पुनः चर्किएको सैन्य तनाव तथा होर्मुज र बाब अल–मान्देब जलसन्धिमार्फत हुने तेल ढुवानीमा बढ्दो जोखिमका कारण विश्व बजारमा तेल आपूर्तिमा अवरोध आउने आशङ्का बढेको छ।

यस्तै, भू–राजनीतिक तनावसँगै तत्कालीन आपूर्तिमा आएको कमी र कच्चा तेलको अल्पकालीन माग बढेकाले पनि मूल्य वृद्धिलाई थप टेवा पुगेको बजार विश्लेषकहरूको भनाइ छ।

विश्लेषकहरूले मध्यपूर्वको अवस्था थप जटिल बनेमा कच्चा तेलको मूल्य अझै बढ्न सक्ने र त्यसको प्रभाव विश्वव्यापी ऊर्जा बजारमा पर्ने चेतावनी दिएका छन्।