निर्मल पुर्जाको नेतृत्वमा रहेको १० सदस्यीय आरोहण हिमपहिरोपछि सम्पकर्विहीन

विश्वप्रसिद्ध नेपाली पर्वतारोही निर्मल पुर्जाको नेतृत्वमा रहेको १० सदस्यीय अन्तर्राष्ट्रिय आरोहण टोली पाकिस्तानस्थित ब्रोड पिक हिमालमा गएको हिमपहिरोपछि सम्पर्कविहीन भएको छ।

पाकिस्तानका पर्वतारोहण अधिकारीहरूका अनुसार काराकोरम पर्वतशृंखलामा अवस्थित ८,०४७ मिटर अग्लो ब्रोड पिकमा बिहीबार मध्याह्नतिर हिमपहिरो गएको थियो। घटनापछि टोलीका सदस्यहरूसँग सम्पर्क हुन नसकेको जनाइएको छ।

बेपत्ता टोलीमा एक अमेरिकी, एक चिनियाँ, एक ओमानी नागरिक तथा पाँच नेपाली आरोहीसहित विभिन्न देशका सदस्य रहेका छन्। हिमपहिरोपछि उनीहरूको अवस्थाबारे हालसम्म यकिन जानकारी प्राप्त हुन सकेको छैन।

अधिकारीहरूका अनुसार मौसम अनुकूल भएमा खोज तथा उद्धार अभियानका लागि हेलिकोप्टर परिचालन गरिनेछ। पाकिस्तानको अल्पाइन क्लबले सरकारी निकायहरूसँग निरन्तर समन्वय भइरहेको र खोज तथा उद्धार कार्य शीघ्र सञ्चालन गर्न आवश्यक पहल भइरहेको जनाएको छ।

क्लबले हेलिकोप्टर सहयोग सुनिश्चित गर्न तथा उपलब्ध सबै स्रोतसाधन परिचालन गर्न प्रयास जारी रहेको उल्लेख गर्दै बेपत्ता आरोहीहरूको सकुशल उद्धारको कामना गरेको छ। साथै, उनीहरूका परिवार तथा अन्तर्राष्ट्रिय पर्वतारोहण समुदायप्रति ऐक्यबद्धता पनि व्यक्त गरेको छ।

विश्वको १२औँ अग्लो हिमाल ब्रोड पिक पर्वतारोहणका दृष्टिले अत्यन्त चुनौतीपूर्ण हिमालमध्ये एक मानिन्छ। निर्मल पुर्जाले सन् २०१९ मा विश्वका ८ हजार मिटरभन्दा अग्ला सबै १४ हिमाल केवल ६ महिनाभन्दा केही बढी अवधिमा आरोहण गरेर विश्व कीर्तिमान कायम गर्दै अन्तर्राष्ट्रिय रूपमा व्यापक चर्चा बटुलेका थिए।