काठमाडौं । नेपाली कांग्रेसले पार्टीको निर्वाचनसम्बन्धी निर्देशिका जारी गर्दै विभिन्न पदका उम्मेदवारका लागि उम्मेदवारी शुल्क, प्रस्तावक र समर्थकको संख्या निर्धारण गरेको छ।
निर्देशिकाअनुसार पार्टी सभापति पदमा उम्मेदवारी दर्ता गर्न ४० हजार रुपैयाँ शुल्क बुझाउनुपर्नेछ। सभापतिका उम्मेदवारलाई १० जना प्रस्तावक र १० जना समर्थक आवश्यक पर्ने व्यवस्था गरिएको छ।
त्यस्तै, उपसभापति र महामन्त्री पदका उम्मेदवारले उम्मेदवारी दर्ताका क्रममा ३०–३० हजार रुपैयाँ शुल्क तिर्नुपर्नेछ। यी दुवै पदका लागि ७ जना प्रस्तावक र ७ जना समर्थक आवश्यक पर्नेछ।
कांग्रेसले सहमहामन्त्री पदका लागि २० हजार रुपैयाँ र केन्द्रीय सदस्य पदका लागि १० हजार रुपैयाँ उम्मेदवारी शुल्क तोकेको छ।
कांग्रेसकी उपसभापति पुष्पा भुसालका अनुसार निर्वाचनसम्बन्धी निर्देशिकामार्फत विभिन्न पदमा उम्मेदवारी दिने नेताका लागि लाग्ने शुल्कसँगै आवश्यक प्रस्तावक र समर्थकको संख्यासमेत स्पष्ट गरिएको हो।
प्रतिक्रिया