सर्लाही । भारतको उत्तर प्रदेशका करिब ८० देखि ९० जना नागरिक सर्लाहीको मलंगवा–गोराकाली सीमा नाकाबाट नेपाल प्रवेश गरेको दाबी गरिएको छ। उनीहरूको विवरण व्यवस्थित रूपमा अभिलेख नगरिएको भन्दै सीमा सुरक्षा व्यवस्थामाथि प्रश्न उठाइएको छ।
प्राप्त विवरणअनुसार, बुधबार राति करिब ९ः३० बजे उनीहरू भारतबाट नेपाल प्रवेश गरेका थिए। हिन्दू सम्राट सेनाको टोलीले सीमा नाकामा चासो देखाउँदै स्थलगत पहल गरेपछि मात्र सुरक्षाकर्मीले उनीहरूसँग परिचय खुल्ने कागजात माग गरेको बताइएको छ।
टोलीको दाबीअनुसार, करिब ९० जनामध्ये २५ जनासँग मात्र आधार कार्ड फेला परेको थियो। त्यसपछि उनीहरूको विवरण अभिलेख गर्ने प्रक्रिया अघि बढाइएको जनाइएको छ। नेपाल प्रवेश गरेका भारतीय नागरिकहरूले सर्लाहीका विभिन्न स्थानमा रोजगारीका लागि आएको बताएका छन्।
घटनाले सीमा नाकामा परिचय खुल्ने विवरण संकलन, अभिलेख व्यवस्थापन तथा सुरक्षा निगरानीको प्रभावकारिताबारे प्रश्न उठाएको छ। खुला सीमा रहेको अवस्थामा पनि सीमा क्षेत्रमा आवश्यक सुरक्षा सतर्कता र व्यवस्थित अभिलेख व्यवस्थापनमा ध्यान दिनुपर्ने देखिन्छ।
यसैबीच, हिन्दू सम्राट सेनाले घटनाप्रति आपत्ति जनाउँदै सम्बन्धित प्रशासन र नेपाल प्रहरीसँग सीमा नाकामा प्रभावकारी निगरानी, आवश्यक जाँच तथा अभिलेख व्यवस्थापन सुनिश्चित गर्न माग गरेको छ।
यद्यपि, घटनाबारे सम्बन्धित प्रहरी तथा स्थानीय प्रशासनको आधिकारिक धारणा प्राप्त हुन बाँकी रहेकाले उल्लिखित विवरणको स्वतन्त्र पुष्टि हुन सकेको छैन।
प्रतिक्रिया