काठमाडौँ । नेपाली कांग्रेसका नेता डा. शेखर कोइरालानिकट नेता–कार्यकर्ताले शेरबहादुर देउवा समूहले अघि बढाउन लागेको महाधिवेशन प्रक्रियामा सहभागी हुन सक्ने भएका छन्।
कोइराला सचिवालयका अनुसार देउवा समूहले बिहीबारदेखि सुरु गर्ने वडा अधिवेशनलगायत महाधिवेशन प्रक्रियामा सहभागी हुने विषयमा नेता–कार्यकर्तालाई कुनै रोक लगाइने छैन। उनीहरूले आफ्नो स्वविवेकअनुसार निर्णय गर्न सक्नेछन्।
शेखरनिकट नेता सञ्जयकुमार गौतमले पनि देउवा समूहको महाधिवेशन प्रक्रियामा सहभागी हुने नेता–कार्यकर्तालाई आफूहरूले नरोक्ने बताए। यद्यपि, शेखर कोइरालासहित आफूहरूले देउवा समूहको महाधिवेशन प्रक्रियामा सहभागी हुने कुनै निर्णय नभएको उनले स्पष्ट पारे।
‘हिजो सदस्यता अद्यावधिक गराएर संस्थापन पक्षको महाधिवेशनमा सहभागी हुनेलाई पनि हामीले रोकेनौँ। भोलिबाट सुरु हुने महाधिवेशनमा पनि जानेहरूलाई रोक्दैनौँ। नेता–कार्यकर्ताले आफूखुसी निर्णय गर्न सक्नुहुन्छ,’ गौतमले भने।
उनका अनुसार शेखर कोइरालासहित आफूहरू भने कुनै पनि समूहको महाधिवेशन प्रक्रियामा सहभागी नहुने अवस्थामा छन्।
यसैबीच, सभापति गगन थापा नेतृत्वको संस्थापन पक्षले असोज १८ गते महाधिवेशन उद्घाटन गर्ने तयारी गरिरहेको छ। देउवा समूहले भने बिहीबारदेखि छुट्टै महाधिवेशन प्रक्रिया अघि बढाउन लागेको छ।
यसरी कांग्रेसमा महाधिवेशनको प्रक्रियालाई लिएर दुई पक्षले छुट्टाछुट्टै गतिविधि अघि बढाइरहेका बेला शेखर पक्षका नेता–कार्यकर्तालाई भने आफ्नो इच्छाअनुसार सहभागी हुने बाटो खुला राखिएको छ।
प्रतिक्रिया