लगातार ओरालो लाग्दै सुनको मूल्य, आज कति घट्यो?


काठमाडौँ । तिहारपछि खुलेको सुनचाँदी बजारमा मूल्य घट्ने क्रम रोकिएको छैन । कारोबार सुरु भएयता लगातार तेस्रो दिन पनि सुनको मूल्यमा गिरावट आएको छ । चाँदीको भाउसमेत निरन्तर ओरालो लाग्दा बजारमा सुनचाँदी दुवै सस्तिएका छन् ।

नेपाल सुनचाँदी व्यवसायी महासंघका अनुसार मंगलबार सुनको मूल्य प्रतितोला २ लाख ६७ हजार २०० रुपैयाँ कायम भएको छ । सोमबार सुन प्रतितोला २ लाख ६९ हजार १०० रुपैयाँमा कारोबार भएको थियो । यसअनुसार एकै दिन सुनको मूल्य १ हजार ९०० रुपैयाँले घटेको छ ।

तिहारअघि कात्तिक २३ गते सुनको मूल्य प्रतितोला २ लाख ८४ हजार ३०० रुपैयाँ थियो । त्यसपछि कात्तिक २७ गते कारोबार खुल्दा नै सुनको भाउ एकैपटक १२ हजार ६०० रुपैयाँले घटेर २ लाख ७१ हजार ७०० रुपैयाँमा झरेको थियो ।

त्यसयता सुनको मूल्य निरन्तर घटिरहेको छ । तिहारअघिको मूल्यसँग तुलना गर्दा मंगलबारसम्म सुन प्रतितोला १७ हजार १०० रुपैयाँले सस्तिएको छ ।

सुनसँगै चाँदीको मूल्यमा पनि उल्लेख्य गिरावट आएको छ । महासंघका अनुसार मंगलबार चाँदीको मूल्य प्रतितोला २ हजार ९९२ रुपैयाँ कायम भएको छ ।

सोमबार चाँदी प्रतितोला ३ हजार ५२० रुपैयाँमा कारोबार भएको थियो । आइतबार यसको मूल्य ३ हजार ६०० रुपैयाँ र शुक्रबार ३ हजार ७०० रुपैयाँ थियो ।

तिहारअघि कात्तिक २३ गते चाँदी प्रतितोला ३ हजार ८५५ रुपैयाँमा कारोबार भएको थियो । त्यसयता चाँदीको मूल्य पनि लगातार ओरालो लागेको छ ।

यसरी तिहारपछि सुनचाँदी दुवैको मूल्यमा निरन्तर गिरावट आउँदा उपभोक्ताले कम मूल्यमा सुनचाँदी खरिद गर्ने अवसर पाएका छन् । यद्यपि, आगामी दिनमा मूल्यको दिशा अन्तर्राष्ट्रिय बजारको उतारचढाव तथा अन्य आर्थिक परिस्थितिमा निर्भर रहनेछ ।