काठमाडौँ – बाढी तथा डुबानबाट प्रभावित नेपाली नागरिकलाई सहयोग गर्न भारतीय बलिउड अभिनेता सोनू सूद काठमाडौँ आइपुगेका छन् ।
बाढी तथा डुबानका कारण प्रभावित परिवारलाई राहत तथा सहयोग गर्ने उद्देश्यले सोनू मंगलबार काठमाडौँ आएका हुन् । विपद्को कठिन घडीमा प्रभावित नेपाली परिवारको साथमा उभिन उनी नेपाल आएका हुन् ।
सोनू सूद सामाजिक सेवाका काममा सक्रिय रहँदै आएका अभिनेता हुन् । विशेषगरी विपद्का समयमा समस्यामा परेका नागरिकलाई सहयोग गर्दै आएका कारण उनी भारतमा मात्रै नभई नेपालमा समेत चर्चित छन् ।
नेपालमा पछिल्लो समय बाढी तथा डुबानका कारण ठूलो जनधनको क्षति भएको छ । सयौँ परिवार प्रभावित भएका छन् भने धेरै नागरिक विस्थापित भएका छन् । यस्तो अवस्थामा सोनूको नेपाल आगमनले प्रभावित परिवारलाई प्रत्यक्ष राहत र सहयोग पुग्ने अपेक्षा गरिएको छ ।
सोनूले नेपालमा रहँदा बाढी प्रभावित क्षेत्र तथा परिवारसँग भेटघाट गर्नुका साथै आवश्यक सहयोगका विषयमा समेत पहल गर्ने बताइएको छ ।
बलिउडका चर्चित कलाकार सोनू सूद विपद्को पीडामा रहेका नेपालीको सहयोगका लागि काठमाडौँ आइपुग्नुलाई मानवीय सहयोग र सद्भावको उदाहरणका रूपमा हेरिएको छ ।
प्रतिक्रिया