काठमाडौं । संयुक्त राज्य अमेरिका र बेलायतले होर्मुज जलडमरूमध्यमा व्यापारिक जहाजहरूको सुरक्षाका लागि अन्तर्राष्ट्रिय समुद्री गठबन्धन गठन गर्ने उद्देश्यले आगामी हप्ता लन्डनमा उच्चस्तरीय बैठक आयोजना गर्ने तयारी गरेका छन्।
एक्सियोसका अनुसार उक्त बैठकमा अमेरिकी रक्षा सचिव पीट हेग्सेथसहित पश्चिमी तथा मध्यपूर्वका विभिन्न देशका रक्षा मन्त्री र सैन्य अधिकारीहरूको सहभागिता रहने अपेक्षा गरिएको छ। बैठकको मिति र कार्यसूची भने अन्तिम चरणमा रहेको जनाइएको छ।
ह्वाइट हाउसका एक अधिकारीले संयुक्त पहलको पुष्टि गरेका छन् भने वासिङ्टनस्थित बेलायती दूतावासले यस विषयमा टिप्पणी गर्न अस्वीकार गरेको बताइएको छ।
प्रतिवेदनअनुसार अमेरिका, बेलायत र फ्रान्सले पछिल्ला महिनाहरूमा विभिन्न देशसँग होर्मुज जलडमरूमध्यको सुरक्षाका लागि अन्तर्राष्ट्रिय गठबन्धन गठनबारे छलफल गर्दै आएका छन्।
एक युरोपेली कूटनीतिज्ञका अनुसार यो पहल इरानसँगको बढ्दो तनाव र अमेरिकी रणनीतिसँग जोडिएको छ। अमेरिकी राष्ट्रपति डोनाल्ड ट्रम्पले तेहरानविरुद्ध कडा चेतावनी दिँदै होर्मुजमा व्यापारिक जहाजमाथि हुने प्रत्येक आक्रमणको जवाफमा इरानका रणनीतिक पूर्वाधारलाई निशाना बनाइने बताएका छन्।
हाल होर्मुज जलडमरूमध्य आसपास बढ्दो सैन्य तनावका कारण विश्वव्यापी तेल आपूर्तिमा असर परेको छ। यसको प्रभावस्वरूप अन्तर्राष्ट्रिय बजारमा कच्चा तेलको मूल्य बढ्दै गएको र विश्व अर्थतन्त्रमा थप दबाब सिर्जना भएको जनाइएको छ।
यसैबीच, युद्धविराम र समुद्री मार्ग पुनः सुरक्षित बनाउने प्रयासस्वरूप ओमानको प्रतिनिधिमण्डल तेहरान पुगेको छ। इरानी सरकारी समाचार एजेन्सी इरनाका अनुसार इरानका विदेशमन्त्री अब्बास अराघची र ओमानका विदेशमन्त्री बद्र अलबुसाइदीबीच समुद्री सुरक्षासहित होर्मुज जलडमरूमध्य र पर्सियन खाडीमा व्यापारिक ढुवानी सहज बनाउने विषयमा छलफल भएको छ।
प्रतिक्रिया